काठमाडौं । ललिता निवास प्रकरणमा अदालतले धरौटीमा रिहा गर्न आदेश दिएपनि एक जना भने कारागार चलान भएका छन् ।

नापी कार्यालय मैतिदेवी काठमाडौंका तत्कालीन अमिन अरूणकमार श्रेष्ठ धरौटी तिर्न नसकेपछि कारागार चलान भएका हुन् ।

काठमाडौं जिल्ला अदालतका न्यायाधीश भोलानाथ ढकालको इजलासले आइतबार पक्राउ परेका १८ जनालाई नै रिहा गर्न आदेश दिएको भएपनि श्रेष्ठले धरौटी तिर्न सकेनन् ।

अदालतले आइतबार एक जनालाई साधारण तारेख र १७ जनासँग धरौटी माग गरेको थियो ।

अदालतले श्रेष्ठसँग ७ लाख ५० रुपैयाँ धरौटी माग गरेको थियो । उनी कारागार चलान भएको कारागारका जेलर ललितकुमार बस्नेतले श्रेष्ठले धरौटी जुटाए छुट्न सक्ने, तर नसकेको अवस्थामा फैसला नहुञ्जेलसम्म कारागारमै रहने छन् ।