काठमाडौं । प्रधानमन्त्री पुष्पकमल दाहाल प्रचण्ड भूकम्प प्रभावित जिल्ला बझाङ प्रस्थान गरेका छन् ।

प्रधानमन्त्री प्रचण्ड शुक्रबार भूकम्प प्रभावित बझाङको अवलोकन गर्न नेपाली सेनाको हेलिकप्टरबाट गएका हुन् ।

त्यहाँ पुगेर प्रधानमन्त्री प्रचण्डले भूकम्पले क्षति पुर्याएका स्थानको अवलोकन गर्ने र जिल्ला विपद व्यवस्थापन समितिसँग अन्तरक्रिया गर्नेछन् । प्रधानमन्त्री प्रचण्ड आजै बेलुका काठमाडौं फर्किने कार्यक्रम छ ।

तालकोट र चैनपुर आसपास केन्द्रबिन्दु भएर असोज १६ गते गएको भूकम्पमा १ जनाको ज्यान गएको छ भने, २० जना घाइते भएका छन् ।

घाइतेहरुमध्ये १३ जना उपचार गरेर घर फर्किसकेका छन् भने ५ जनालाई अन्यत्र रिफर गरिएको छ । जिल्ला अस्पतालमा २ जना उपचाररत छन् ।

भूकम्पले घरलगायतका भौतिक संरचनामा धेरै क्षति पुगेको भए पनि एकिन विवरण आइसकेको छैन ।