काठमाडौं । इजरायलको मध्य र दक्षिण क्षेत्रमा प्यालेस्टाइनको हमास समूहले गरेको आक्रमणमा ९ नेपाली घाइते भएका छन् । घाइतेमध्ये दुईको अवस्था गम्भीर छ ।

इजरायलस्थित नेपाली राजदूतावासले घटनामा ९ जना नेपाली घाइते भएकोमा २ को अवस्था गम्भीर रहेको जनाएको छ ।

घाइते हुनेमा सुदूरपश्चिम विश्वविद्यालयबाट बिएस्सी एग्रिकल्चर अध्ययन गरेर इजरायलमा लर्न एन्ड अर्नअन्तर्गत ११ महिनाका लागि इन्टर्न गर्न गएका विद्यार्थी छन् । सुदूरपश्चिम विश्वविद्यालयका ४९ विद्यार्थी गत भदौ २७ मा इजरायल पुगेका थिए ।

इजरायलमा रहेका एक नेपाली विद्यार्थीले बताएअनुसार, घाइतेमध्ये पाँच नेपालीलाई उद्धार गरेर अस्पताल लगिएको छ ।

परराष्ट्र मन्त्रालय स्रोतका अनुसार, हमासले कब्जामा लिएको किबुज क्षेत्रमा पनि नेपालीहरू छन् ।

इजरालयलमा करिब पाँच हजार नेपाली रहेको अनुमान छ । हमासको आक्रमणपछि नेपालीहरूले असुरक्षित बनेको भन्दै सरकारसँग उद्धारको माग गरिरहेका छन् । सरकारले परिस्थितिलाई मध्यनजर गर्दै त्यहाँ रहेका नेपालीलाई सतर्क रहन अनुरोध गरेको छ ।