काठमाडौं । अंश सम्बन्धी विषयमा विवाद हुँदा श्रीमतीलाई घाँटी कसेर हत्या गरेका ७० वर्षीय सूर्यबहादुर दवाडी पक्राउ परेका छन् ।

धादिङ ज्वालामुखी गाउँपालिका-१ बस्ने ७० वर्षीय सूर्यबहादुर दवाडीलाई २१ वर्षपछि सोमबार केन्द्रीय अनुसन्धान व्युरो महाराजगंजबाट खटिएको टोलीले पक्राउ गरेको हो ।

२०५९ फागुन २८ गते ज्वालामुखी गाउँपालिका-१ स्थित घर बारीमा सूर्यबहादुरले अंश सम्बन्धी बिषयमा झगडा हुँदा आफ्नै श्रीमती सानुमाया दवाडीलाई कुटपिट गरी नाम्लोले घाँटी कसेर हत्या गरेका थिए ।

हत्यापछि कर्तव्य ज्यान मुद्दामा जिल्ला अदालत धादिङको २०६१ जेठ ५ गतेको फैसलाले उनलाई सर्वस्वसहित जन्मकैद ठहर गरेको थियो ।

अदालतबाट सर्वस्वसहित जन्मकैद सजाय भएका सूर्यबहादुर लामो समयसम्म पक्राउ पर्न सकेका थिएनन् । सीआईबीको टोलीले उनलाई सोमबार रूपन्देही सिद्धार्थनगर नगरपालिका-१ बेलहियाबाट पक्राउ गरेको हो ।

उनलाई फैसला कार्यान्वयनको लागि जिल्ला अदातल काठमाडौंमा दाखिला गरेकोमा अदालतको आदेश अनुसार कैद भुक्तानको लागि केन्द्रीय कारागार जगनाथदेवल पठाइएको छ ।