काठमाडौं (एजेन्सी) । विस्फोटक पदार्थ भण्डारण गरिएको रुसको सैन्य पानीजहाज मस्कोभामा विस्फोट भएको छ । ब्ल्याक सीमामा तैनाथ उक्त पानीजहाजमा आगलागी र विस्फोट भएको हो ।

रुसको रक्षा मन्त्रालयले विस्फोटबाट सैन्य पानीजहाजमा नराम्ररी क्षति पुगेको जनाएको छ । पानीजहाजका चालक दलका सदस्यको भने उद्धार गरिएको छ ।

युक्रेनी राष्ट्रपतिका एक सहयोगी ओलेक्सी एरिस्ट्रोभिचले रुसी उद्धारकर्ताहरू उक्त पानीजाहाजमा पुग्न नसकिरहेको दाबी गरेका थिए । उनले जहाजमा ५१० जनासम्म रहेको बताए पनि त्यसको पुष्टि भने भएको थिएन ।

विस्फोटको कारण नखुलेको र यसबारे अनुसन्धान भइरहेको जनाइएको छ । तथापि, यसअघि एक युक्रेनी अधिकारीले उक्त सैनिक जहाजमा दुईवटा युक्रेनी क्षेप्यास्त्र लागेको बताएका थिए। युक्रेनमा बनेको नेप्च्युन क्षेप्यास्त्र उक्त सैनिक जहाजमाथि प्रहार गरिएको ती अधिकारीको भनाइ थियो ।

मस्कोभा क्षेप्यास्त्र क्रुजर तत्कालीन सोभियत सङ्घ रहेको बेला सन् १९८० को दशकको सुरुमा युक्रेनको दक्षिणी शहर मेकलोएभमा निर्माण गरिएको थियो । सुरुमा यसलाई स्लाभा भनिन्थ्यो र पछि मोस्कोभा नाम दिइयो। यो १ सय ८६ मिटर लामो छ । जसलाई गोलाबारीका निम्ति रुसी फौजहरूले प्रयोग गर्दै आएका थिए।

यसैबीच, रुसी सेनाले आफ्नो भूमिमा आक्रमण भइरहे युक्रेनको राजधानीमा रहेका कमान्ड केन्द्रहरूमा हमला गर्ने चेतावनी दिएको छ।