काठमाडौं । राजावादीहरूको हिंसात्मक प्रदर्शनपछि तीनकुने क्षेत्रमा लगाइएको कर्फ्यू हटाइएको छ ।

पहिलो पटक शुक्रबार साँझदेखि लगाएको कर्फ्यू राति १० बजेसम्म तोकेकोमा त्यसलाई थप गरेर शनिबार बिहान ७ बजेसम्म लम्ब्याइएको थियो । अवस्था सामान्य बनेपछि प्रशासनले शनिबार बिहानदेखि कर्फ्यूको समय थप नगरी हटाएको हो ।

जिल्ला प्रशासन कार्यालय, काठमाडौंका प्रमुख ऋषिराम तिवारीले तीनकुने क्षेत्रमा गरिएको कर्फ्यू आदेश स्थगित गरिएको बताए ।

राजावादी संगठनले शुक्रबार राजधानीको तीनकुने क्षेत्रमा गरेको प्रदर्शन हिंसात्मक बनेको थियो । दुई जनाको ज्यान जानेगरी भएको उक्त घटनामा कैयन् निजी तथा सरकारी सम्पत्तिमाथि आगजनी गरिएको थियो ।