काठमाडौँ । भारतीय प्रधानमन्त्री नरेन्द्र मोदीले नेपालमा जारी आन्दोलनका क्रममा भएको हिंसात्मक घटनाबारे गहिरो पीडा व्यक्त गरेका छन्।

हिमाचल प्रदेश र पञ्जाबको भ्रमण सकी फर्किएलगत्तै उनले सुरक्षा सम्बन्धी मन्त्रिपरिषद् समितिको बैठकमा नेपालप्रतिको घटनाक्रमबारे विस्तृत छलफल भएको जानकारी दिएका छन्।

सामाजिक सञ्जालमार्फत विचार व्यक्त गर्दै प्रधानमन्त्री मोदीले नेपालमा भएको हिंसालाई ‘हृदयविदारक’ भनेका छन्। उनले युवाको ज्यान गएको घटनालाई पीडादायी बताउँदै नेपालप्रतिको भारतको गहिरो चिन्ता र सद्भाव प्रकट गरेका छन्।

उनले भने, “नेपालको स्थिरता, शान्ति र समृद्धि भारतका लागि अत्यन्त महत्वपूर्ण छ।” साथै उनले नेपालका जनतालाई शान्ति–व्यवस्था कायम राख्न संयमता अपनाउन आग्रह गरेका छन्।