काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’को सचिवालयले नेपाल प्रहरीका पूर्वएआईजी देवेन्द्र सुवेदीविरुद्ध साइबर ब्युरोमा उजुरी दिएको छ ।

सुवेदीले केही दिनअघि एक युट्युब च्यानललाई अन्तर्वार्ता दिँदै आन्दोलनको दुई दिनअगाडि प्रचण्ड निवासबाट दुई ट्रक पैसा लोड गरेर अन्यत्र लगिएको दाबी गरेका थिए ।

सुवेदीको उक्त दाबी तत्काल खण्डन गरेको सचिवालयले आइतबार नेपाल प्रहरीको साइबर ब्युरोमा उजुरी दिएको हो ।

प्रचण्डको सचिवालयले भ्रामक कुरा फैलाउने सुवेदीविरुद्ध कारबाही माग गर्दै साइबर ब्युरोमा उजुरी दिएको जनाएको छ ।

जेनजी विद्रोहका क्रममा प्रदर्शनकारीहरूले राजनीतिक दलका नेताका घरमा आगजनी गरेका थिए । त्यसक्रममा नेपाली कांग्रेसका सभापति शेरबहादुर देउवा र माओवादी केन्द्रका अध्यक्ष प्रचण्डको निवासमा डढेको अवस्थामा स्वदेशी तथा विदेशी मुद्रा फेला परेका थिए । त्यसको केही दिनपछि सम्पत्ति शुद्धीकरण विभागले देउवा र दाहालको निवासमा स्थलगत अवलोकन गरी यसबारे आवश्यक अनुसन्धान प्रक्रिया अघि बढाइसकेको छ ।