काठमाडौं । गत भदौ २३ र २४ गतेको जेनजी विद्रोहको निशानामा परेको सर्वोच्च अदालतले मंगलबारदेखि रिट निवेदन दर्ता गर्ने भएको छ ।

सर्वोच्चले एक सूचना जारी गर्दै मंगलबारबाट रिट निवेदन लिन लागिएको जनाएको छ ।

सर्वोच्चका अनुसार मंगलबारदेखि मुलुकी देवानी कार्यविधि संहिता, २०७४ को दफा १५७ तथा मुलुकी फौजदारी कार्यविधि संहिता, २०७४ को दफा ७३, १३७ र १५५ का निवेदनहरूको दर्ता एवं सुनुवाइ हुनेछ ।

म्याद, हदम्याद र तारिख लिने सेवा सञ्चालन गर्न भने अझै केही समय लाग्ने भएको छ । यी सेवा सञ्चालन नभए पनि म्याद नगुज्रने सर्वोच्चले जनाएको छ ।

गत भदौ २४ गते जेनजी आन्दोलनका क्रममा सर्वोच्च अदालतमा आगजनी गरिएको थियो । आगजनीबाट पुराना कागजात र मुद्दाका मिसिल जलेका थिए ।

त्यसपछि बन्दी प्रत्यक्षीकरणसहित अत्यावश्यक मुद्दाको मात्र सुनुवाइ गरिएको थियो । अवस्था केही सहज भएपछि सर्वोच्चले मंगलबारबाट रिट निवेदन लिने निर्णय गरेको हो ।