काठमाडौं । भारतमा एकै परिवारका पाँच जनाको घाँटी रेटेर पाशबिक ढंगले हत्या भएको छ । एक बालिका घाइते छिन् । आक्रमणपछि घरमा समेत आगो लगाइएको छ ।

भारतको उत्तर प्रदेशको प्रयागराज जिल्लास्थित थर्वई थाना क्षेत्रको खेवराजपुर गाउँमा एकै परिवारका पाँच जनाको हत्या भएको हो । भारतीय सञ्चारमाध्यमहरूले शुक्रबार मध्यराति उनीहरूको हत्या भएको जनाएका छन् ।मध्यराति घटना भए पनि स्थानीयको सूचनापछि प्रहरीले आइतबार बिहान मात्र यसबारे जानकारी पाएका थिउ ।

हिन्दूस्तान टाइम्सका अनुसार मृतकमध्ये ३८ वर्षीय महिला, उनका १४, १० र ८ वर्षका तीन छोरीको शव बिछ्यौनामा भेटिएको छ । ४२ वर्षीय एक व्यक्ति भने घरको आँगनमा झुण्डिएको अवस्थामा फेला परेका छन् ।

पाँच वर्षीया बालिकामाथि समेत आक्रमण भएको छ । तथापि, उनी बाँच्न सफल भएकी छन् । उनको अहिले उपचार भइरहेको बताइएको छ ।

हत्यापछि घरमा समेत आगो लगाइएको छ । त्यहाँस्थित प्रहरीलाई उद्धृत गर्दै भारतीय सञ्चारमाध्यमले लेखेअनुसार हत्याराको शव जलाउन घरमा आगो लगाइएको हो ।

प्रहरीले घटनास्थलमा दुई पृष्ठ लामो हस्तलिखित सामग्री भेटिएको छ । जसमा सम्पत्ति विवादका कारण हत्या भएको जनाइएको प्रयासगारका एसएसपी अजय कुमारले बताएका छन् ।