काठमाडौं । तीन जना सशस्त्र वन्यजन्तु अधिकारीहरु गाउँमा सिंह पसेको भन्ने उजुरीपछि सावधानीपूर्वक त्यस क्षेत्रमा पुगेका थिए । केन्याका ती अधिकारहिरुले खोज्दै जाँदा झाँडीमा सिंहको टाउकोको तस्बिर छापिएको एउटा झोला फेला पारे ।

माउन्ट केन्या राष्ट्रिय निकुञ्जबाट एक किलोमिटरको दूरीमा रहेको किन्याना गाउँका किसानले आफ्ना मालिकको घरबाहिर आफूले एउटा सिंह देखेको भन्दै जानकारी गराएका थिए । एभोकाडोको बिरुवा भएको त्यो झोला घर मालिकले झाडीमा राखेका थिए ।

स्थानीय प्रमुख साइरस एमबिजिवेले यस क्षेत्रमा सिंहहरु डुलेको थाहा नपाए पनि त्यहाँका बासिन्दाले आफ्ना केही गाईवस्तु हराएको गुनासो गरेकाे बताए ।

‘हामीले घटनालाई धेरै सावधानी र गम्भीरताका साथ लियौं । पहिला त्यस क्षेत्रका सबैजना सुरक्षित छन् भनी सुनिश्चित गर्‍यौं र वन्यजन्तु अधिकारीहरूले अनुसन्धान गर्दा झाडीमा सिंहको तस्बिर अंकित झोला भेट्टाए’ प्रमुखले भने ।

वन्यजन्तु संरक्षकलाई बोलाउँदा घरधनी घरमा थिएनन् । उनीहरू घर फर्किएपछि सिंहबारे बताउँदा त्यहाँ झोला रहेको पत्ता लागेको हो ।

किनमेल गर्न प्रयोग भएको उक्त झोला झ्यालको तल थियो । त्यो झोला हेरेपछि अधिकारीहरुले त्यहाँ कुनै सिंह नभएर त्यही झोला भएको पुष्टि गरे । गलत सूचनाका बावजुद पनि केन्या वन्यजन्तु सेवाले सम्भावित खतरा कम गर्न स्थानीयले दिएको सूचना र उनीहरुले देखाएको सर्तकताको प्रशंसा गरे ।