काठमाडौं । सामाजिक सञ्जालको दुरुपयोग गरी अनलाइनमार्फत ठगी गरेको अभियोगमा प्रहरीले एक युवकलाई पक्राउ गरेको छ । सोह्रखुट्टे बस्ने ३५ वर्षीय उत्सव श्रेष्ठलाई प्रहरीले पक्राउ गरेको हो ।

श्रेष्ठले वाट्सएप, ईमो, भाइबरमार्फत चिठ्ठा परेको म्यासेज गरी मानिसहरुसँग बैंक खाता माग्दै आएका थिए ।

उनले आफू कम्बोडियास्थित क्यासिनोमा काम गर्ने व्यक्ति भएको र अमेरीकाबाट सञ्चालन भएको चिठ्ठाबाट ६ लाख २७ हजार ६११ युरो परेको म्यासेज पठाएर उनीहरुलाई बैंक खातामा पैसा जम्मा गर्न लगाएको प्रहरीले जनाएको छ ।

श्रेष्ठले २८ लाख ७९ हजार रुपैयाँ ठगी गरेका छन् । उनलाई ठगीसम्बन्धी कसुरमा थप कारवाहीका लागि जिल्ला प्रहरी परिसर काठमाडौं पठाइएको छ ।