काठमाडौं । कांग्रेस महामन्त्री विश्वप्रकाश शर्माले स्वतन्त्रका बालेन शाहको काठमाडौं महानगरपालिकाको मेयरमा भएको जित कांग्रेसको पराजयमात्रै नभएर जनताको विश्वास र जित भएको टिप्पणी गरेका छन् ।

सामाजिक संजालमा लेख्दै मतदाताले विजय गराइसकेपछि बालेन एक्लै हुन् वा एक्लै छन् भन्ने नसोच्न पनि शर्माले आग्रह गरेका छन् ।

जनताको काममा जननिर्वाचित मेयरलाई सघाउनसमेत शर्माले अपिल गरेका छन् ।

‘बालेनको विजय हाम्रो पराजयमात्रै होइन, उनीप्रति जनताको आशा र विश्वासको जित पनि हो’ शर्माले भनेका छन्, ‘उनलाई सफलताको साथ र शुभकामना दुवै दिउँ । लोकतन्त्रमा जनता जनार्दनको फैसला सर आखों पर ।’

वैकल्पिक दलहरू पनि मैदानमा खडा भए पनि उनीहरूलाई र नारालाई नरोजेको भन्दै शर्माले सचेत मतदाताले दललाई बदल्ने सन्देश दिएको बताए ।

देशको राजधानी सहर काठमाडौं महानगरपालिकामा कांग्रेस र एमालेको बलियो पकडकलाई पन्छाउँदै स्वतन्त्रका बालेन शाह मेयरमा निर्वाचित भएका छन् । बलियो प्रभाव र पहुँचविरुद्ध बालेनले जितेपछि उनको चौतर्फी चर्चा र प्रशंसा भइरहेको छ ।

हर्क साम्पाङलाई सबैले सघाउनुपर्छ : विश्वप्रकाश