काठमाडौं । आगामी असार १ गतेबाट तीन महिना सडक विभागमातहतका सडक खन्न तथा खोस्रन नपाइने भएको छ ।

सडक विभागअन्तर्गतको संघीय सडक सुपरिवेक्षण तथा अनुगमन कार्यालयले गुणस्तर बिग्रन नदिन आगामी असार १ देखि भदौ मसान्तसम्म सडक खन्न स्वीकृति नदिने नीति अख्तियार गरेको हो ।

वर्षायाममा धारा, ढल, बिजुली, टेलिफोनलगायत प्रयोजनका लागि खनिएको सडक तत्काल मर्मत गरी यथास्थितिमा ल्याउन नसकिने र यसले सडकको गुणस्तर थप खस्किने भएकाले विभाग मातहतका सडकमा यस्तो नियम लागू गरिएको अनुगमन कार्यालयले जनाएको छ ।

विभागको स्वीकृतिबेगर कसैले सडक खनेको पाइएमा सार्वजनिक सडक ऐन, २०३१ अनुसार कारबाही गरिने चेतावनी पनि अनुगमन कार्यालयले दिएको छ ।

‘… कसैले जबरजस्ती सडक खनेको पाइएमा सार्वजनिक सडक ऐन, २०३१ अनुसार कडा कारबाही गरिने बेहोरा सम्बन्धित सबैको जानकारीका लागि अनुरोध छ,’ जारी सूचनामा भनिएको छ ।