काठमाडौं । पुँजी बजार सुधारको माग गर्दै आन्दोलनरत लगानीकर्ताको माग सम्बोधनका लागि कार्यान्वयन समिति गठन भएको छ । नेपाल धितोपत्र बोर्डका अध्यक्ष रमेशकुमार हमालले समितिमार्फत जायज माग कार्यान्वयन गर्न सकिने बताएपछि समिति गठन भएको हो ।

बजार न्यून बिन्दुमा आइपुगेको र यसमा चार करोड र १२ करोडको सेयर धितो सीमा कर्जा हटाउनेलगायतको १९ बुँदे माग राख्दै लगानीकर्ता लितक कोइराला आठ दिनदेखि अनशनमा बसेका छन् । बुधबार उनको स्वास्थ्य अवस्थालाई ध्यानमा राखेर तत्काल कार्यान्वयन गर्न सकिने बुँदालाई कार्यान्वयन गर्न समिति गठन भएको बोर्ड अध्यक्ष हमालले बताए ।

आन्दोलनरत लगानीकर्तासहित अनसन बसेका तिलक कोइरालाको १९ बुँदे माग कार्यान्वयनमा लगानीकर्ताको तर्फबाट राधा पोखरेल, तुलसी ढकाल र उत्तम अर्याल तथा नेपाल धितोपत्र बोर्डका तर्फबाट निमित्त कार्यकारी निर्देशकद्वय मुक्तिराज श्रेष्ठ र निवयदेव आचार्य रहने भएका छन् ।