काठमाडौं । काठमाडौं महानगरपालिकाले आजदेखि फोहोर उठाउने भएको छ । महानगरपालिकाको फोहोर पछिल्लो एक सातादेखि उठ्न सकेको थिएन ।

महानगरपालिकाले एक सूचना जारी गर्दै बिहीबारबाट पूर्ववत् फोहोर उठ्ने जनाएको छ ।

एक सातादेखि फोहोर नउठ्दा काठमाडौं सडकमा फोहोर थुप्रिएर दुर्गन्ध फैलिएकाे छ ।  वर्षाका कारण निस्किएकाे फाेहाेरकाे  लिचेडले राेगहरूकाे जाेखिम पनि बढेकाे छ ।

महानगरपालिकाले ती फोहोर आजबाट क्रमशः उठाइने जनाएको छ ।

बञ्चरेडाँडा जाने सडक स्तरोन्नति गर्नुपर्ने भएपछि स्थानीयको आग्रहमा महानगरपालिकाले एक साताअघि फोहोर उठाउन बन्द गरेको थियो । वर्षौंदेखि बञ्चरेडाँडामा काठमाडौं उपत्यकाको फोहोर व्यवस्थापन हुँदै आए पनि सडकको अवस्था दयनीय छ ।

महानगरपालिकाले सडक मर्मतको काम सकिएकाले फोहोर उठाउन लागिएको जनाएको छ ।