काठमाडौं । संघ र प्रदेशका लागि भइरहेको निर्वाचनमा अपेक्षा गरिएको भन्दा निकै कम संख्यामा मतदान भइरहेको छ ।

निर्वाचन आयोगले ६० देखि ६५ प्रतिशतमात्रै मत खस्न सक्ने अनुमान गरेको छ ।

५ बर्षका लागि संघ र प्रदेशमा सरकार बनाउने, देशका लागि महत्वपूर्ण ऐन तथा नीति बनाउने प्रतिनिधि छनौट गर्ने निर्वाचनका लागि यो मतदान संख्या निकै कम हो ।

देशभर हरेक मतदान केन्द्रमा कम संख्यामा मतदान हुनुलाई नागरिकमा रहेको राजनीतिक दलप्रतिको वितृष्णाको रुपमा ब्याख्या गरिएको छ ।

यसै सन्दर्भमा हामीले कम मतदान हुनुको मुख्य कारणहरु के हुन सक्छन् भनेर निर्वाचन आयोगका पूर्व प्रमुख आयुक्त भोजराज पोखरेललाई सोधेका थियौँ ।

पोखरेलका अनुसार अहिले खेतिपाती भित्र्याउने सिजन हो । दलहरुले कृषकको प्राथमिकता खेतिबाट एक दिनका लागि मतमा तान्न सकेनन ।

अर्थात, उनीहरूले एक दिन आफ्ना प्रतिनिधि छान्दा बाँकी ५ बर्ष आफूहरूको जीवनस्तरमा सुधार आउँछ भनेर विस्वास दिलाउन सकेनन् ।

यस्तै, ठूलो संख्यामा मतदाता देश भन्दा बाहिर रहनु पनि कम मतदान हुनुका विभिन्न कारणमध्येको एक प्रमुख कारण रहेको पोखरेलको बुझाई छ ।

‘आम नागरिकले राजनीतिक दलहरूको गतिविधिलाई नजिकबाट हेरिरहेको हुन्छन् । यसअघि दलका गतिविधीले आम मानिसलाई आकर्षित गर्न सकेनन् । गठबन्धनका नाममा नागरिकले चाहेको जस्तो उम्मेदवार पनि भएनन्,’ उनले भने, ‘मन नपरेका उम्मेदवारलाई फेरि पनि मत दिनुपर्ने बाध्यात्मक कारणले मतदातामा निरासा देखिएको हो।’