मस्को । रुसमा विभिन्न बहुराष्ट्रिय कम्पनीले आफ्ना कारोबार रोक्ने क्रम जारी राखेका छन् । पछिल्लोपटक अमेरिकी कम्पनी वाल्ट डिज्नीले रुसमा आफ्नो कारोबार केही समयका लागि स्थगित गर्ने घोषणा गरेको छ ।

अमेरिकी बैंक गोल्डम्यान स्याक्सले पनि रुसबाट बाहिरिन लागेको जनाएको छ । यस्तो कदम चाल्ने गोल्डम्यान स्याक्स अमेरिकाको पहिलो महत्त्वपूर्ण बैंक हो ।

यसबाहेक  काेकाकाेला, म्याकडोनाल्ड्सलगायतका कम्पनीले पनि रुसमा आफ्नो कारोबार बन्द गरेका छन् । तर बर्गर किङ रेस्टुरेन्ट रुसमा खुलिरहेको छ । एली लिलीले औषधिको आपूर्ति गरिरहेको छ । पेप्सीकोले दुध र बालबालिकाको खाद्यान्न बेचिरहेको छ ।

युक्रेनमा घातक हिंसाका कारण मानवीय संकट बढ्दै गएपछि रुसलाई सजाय दिन पश्चिमी सरकारहरूले आर्थिक प्रतिबन्धहरू बढाएपछि रुसबाट बाहिरिने व्यवसायहरूको गति गत सातादेखि ह्वात्तै बढ्यो ।

प्रमुख तेल कम्पनीहरू बिपी र शेल रुसमा अर्बौं डलर लगानी गर्नबाट टाढिए । म्याकडोनाल्ड, स्टारबक्स र युनिक्लोले ग्राहकहरूलाई सेवा दिन बन्द गरे ।