काठमाडौं । कांग्रेसले राप्रपाबाट पार्टी प्रवेश गरेका सुनिलबहादुर थापालाई सह–महामन्त्री बनाउने निर्णय गरेको छ । शुक्रबार बसेको केन्द्रीय समितिको बैठकले पूर्व प्रधानमन्त्री सूर्यबहादुर थापाका छोरा सुनिलबहादुर थापालाई सह–महामन्त्री बनाउने निर्णय गरेको जानकारी नेता रामचन्द्र पौडेलले दिए । थापा बाहेक राप्रपाबाट आएका अन्य ६ जना नेतालाई पनि कांग्रेसको केन्द्रीय सदस्य बनाउन सहमति भएको जानकारी उनले दिए । पाँच केन्द्रीय सदस्यमा विष्णुविक्रम थापा सिन्धुपाल्चोक, किरण गिरी काठमाडौं, बाबुराम बस्नेत भोजपुर, रामकृष्ण भट्टराई मोरङ, वृजलाल यादव बारा र टि.एन. योगी ललितपुर  छन् । दिलिप राई झापा, आशाराम चौधरी कैलाली र राजेशबहादुर सिंह कपिलवस्तुबाट आमन्त्रित केन्द्रीय सदस्य बनेका छन् । क्रियाशील सदस्यताको विवाद विधिसम्मत टुंग्याउने निर्णय भएको भन्दै उनले मंसिर मसान्तसम्म ७७ वटै जिल्लाले केन्द्रलाई सदस्यताको सूची पठाउनेबारे निर्णय भएको जानकारी पनि दिए ।