पुष्कर खड्का, नागरिक पत्रकार (रामेछाप) । रामेछापको सुनापति गाउँपालिकाले सोनाम ल्होसारको अवसरमा तीन दिन सार्वजनिक बिदा दिने निर्णय गरेको छ ।

गाउँपालिकाले मंगलबार एक सूचना जारी गर्दै पर्वका अवसरमा १८ माघदेखि २० माघसम्म सार्वजनिक बिदा दिने निर्णय गरिएको जनाएको छ ।

गाउँपालिकाका प्रमुख प्रशासकीय अधिकृत कमलराज श्रेष्ठले तामाङ समुदायको विशेष पर्व भएकाले तीन दिन सार्वजनिक बिदा दिने निर्णय गरिएको जनाएका छन् ।

उनका अनुसार अबका तीन दिन गाउँपालिकाअन्तर्गतका सम्पूर्ण सरकारी तथा गैरसरकारी कार्यालय बन्द रहनेछन् ।

यस वर्षको सोनाम ल्होसार माघ १९ मा मनाइँदै छ । गाउँपालिकाले कोभिड–१९ संक्रमणको बढ्दो जोखिम ख्याल गरेर यसलाई मनाउन आग्रह गरेको छ ।