फिदिम (शंकर चापागाईं, नागरिक पत्रकार) । गाउँपालिकास्तरीय चौथो राष्ट्रपति रनिङ सिल्ड खेलकुद प्रतियोगिता बिहीबारदेखि पाँचथरको फाल्गुनन्द गाउँपालिकामा सुरु भएको छ।

फाल्गुनन्द गाउँपालिकाको आर्थिक सहयोगमा फाल्गुनन्द–२ स्थित सत्यहाङ्मा माध्यमिक विद्यालय इम्बुङमा बिहीबारदेखि प्रतियोगिता सुरु भएको हो ।

प्रतियोगिताको संघीय सरकारका पूर्व भौतिक पूर्वाधार तथा यातायात मन्त्री वसन्तकुमार नेम्वाङले उदघाटन गरे । सो क्रममा नेम्वाङले खेलकुदको विकास अपरिहार्य रहेको बताए ।

प्रतियोगितामा गाउँपालिकाका ११ वटा माध्यमिक विद्यालयहरूको सहभागिता रहेको खेल आयोजक मूल समितिका सचिव तथा सत्यहाङ्मा माध्यमिक विद्यालयका प्रधानाध्यापक रामभक्ति नेम्वाङले जानकारी दिए । तीन दिनसम्म सञ्चालन हुने प्रतियोगितामा छात्र तथा छात्राहरूको भलिबल, कबड्डी, विभिन्न दूरीका दौड, हाइजम्प, लङजम्प, त्रिपलजम्प, कराँते, तेक्वान्दो, उसुज्याभलिङ थ्रो, सटपुटलगायत खेलहरू सञ्चालन हुने आय‍ोजकले जनाएको छ । प्रतियोगिता भोलिसम्म सञ्चालन हुनेछ ।