काठमाडौं (एजेन्सी) । संयुक्त राष्ट्र संघका महासचिव एन्टेरियो गुटरेसले आफ्नै संगठन सुरक्षा परिषद् रुस–युक्रेन युद्ध रोक्न असफल भएको भन्दै आलोचना गरेका छन् ।

दुई देशको युद्ध अन्त्यको प्रयासमा रुसपछि युक्रेन पुगेका गुटरेसले सुरक्षा परिषद्को भूमिकाप्रति असन्तुष्टि जायर गरेका हुन् । उनले परिषद्को विफलता ठूलो खिन्नता, निराशा र क्रोधको कारण रहेको बताए ।

‘म स्पष्टसँथ भन्न चाहन्छु कि सुरक्षा परिषद् रुस–युक्रेन युद्ध रोक्न तथा नियन्त्रणन गर्न असफल भयो,’ उनले भने ।

परिषद्मा विश्वका १५ राष्ट्र छन् । यसको मुख्य कार्यभार विश्वमा शान्ति र अमनचयन कायम गर्नु हो । तर परिषद् रुस–युक्रेन युद्धमा करिब–करिब रमितेको भूमिकामा छ । त्यहाँ शान्ति स्थापनाका लागि प्रस्तावहरू ल्याइए पनि पाँच स्थायी सदस्य राष्ट्रमध्ये एक रुसले भिटोमार्फत निष्क्रिय तुल्याइदिएको थियो ।

सुरक्षा परिषद् निकम्मा बनिरहे पनि राष्ट्र संघका अन्य अंगहरूले भने रुस–युक्रेन युद्ध अन्त्यका निम्ति प्रयास जारी राखेको गुटरेसले दाबी गरे ।

‘राष्ट्र संघ पछि हट्दैन भन्ने जानकारी दिन म यहाँ आएको हुँ,’ गुटरेसले भने, ‘हामीले अहिले युक्रेनमा खानेकुरा, नगदलगायत सहयोग गरिरहेका छौं ।’