काठमाडौं । बुधबार काठमाडौंको बुद्धनगरिस्थत ज्ञान निकेतन स्कुलबाट नियन्त्रणमा लिएको भैंसीको अहिले उपचार भइरहेको छ ।

ललितपुरको भैंसीपाटीमा रहेको स्नेहाज केयरले यो भैंसीको उपचार गरिरहेको हो । विगत ८ बर्षदेखि स्नेहाज केयरले सडकमा भोकभोकै भौँतारिएका कुकुर र छाडा पशु चौपयाको संरक्षण गर्दै आइरहेको छ ।

यो भैंसी बुधबार बिहान बुद्धनगर र शंखमुल क्षेत्रमा भौतारिँदै पसेको थियो । त्यसपछि बुद्धनगरस्थित स्कुलको कम्पाउण्डमा प्रवेश गरेको भैंसीलाई त्यसको तीन घण्टापछि डार्ट (लठ्याउने सूइ) प्रयोग गरेर नियन्त्रणमा लिइएको थियो ।

नियन्त्रणमा लिएपछि स्नेहाज केयरको एम्बुलेन्समा भैंसीलाई उपचारका लागि लगेको हो । अहिले भैंसीको उपचार भइरहेको जनाइएको छ । स्नेहाज केयरका अनुसार भैंसीको शरिरमा धेरै नै चोटपटक लागेको छ ।

भैंसीमाथी हथौडा प्रहार भएको जनाइएको छ । र, यो भैंसी चोटपटकको पिडाबाट उम्किएर हिँडेको स्नेहाज केयरले जनाएको छ ।

स्नेहाज केयरको फेसबुक पेजमा लेखिएको छ, ‘एका बिहानै एउटा भैंसी बुद्धनगर क्षेत्रमा रुम्मलिँदै गरेको अवस्थामा फेला पर्दछ । त्राशले भरिएका उस्का आँखा र घाऊले भरिएको उसको शरीर र हतौंडाको प्रहारले उसको टाउकोमा लागेको चोटहरुले ऊ आफ्नो ज्यान जोगाउनका निम्ती बधशालाबाट भागेको भन्ने कुरा दर्शाउँछ ।’

स्नेहाज केयरले पशु हिंसा र पशु क्रुरताकोविरुद्ध आवाज उठाउन पनि अनुरोध गरेको छ । योसँगै भैंसीको उद्धारमा भूमिका खेल्नेहरुलाई धन्यावाद पनि दिएको छ ।