काठमाडौं । सवारी साधनमा प्रेसर हर्न, झिलिमिली–झल्लर बत्ती तथा ‘फग्स लाइट’ राख्नेलाई प्रहरीले कारबाही थालेको छ । यसले ध्वनी प्रदुषण तथा दुर्घटनाको जोखिम बढाएको भन्दै काभ्रे प्रहरीले कारबाही अभियान चलाएको हो ।
जिल्ला प्रहरी कार्यालय काभ्रेपलान्चोक र जिल्ला ट्राफिक प्रहरी कार्यालयको संयुक्त टोलिले जिल्लाका विभिन्न १० स्थानमा चेकजाँच गरी दुई सय ३० वटा मालवाहक तथा यात्रुवाहक सवारी साधनबाट प्रेसर हर्न निकालेको छ । साथै, ५५ वटा सवारीसाधनबाट अनावश्यक लाइट तथा झल्लर निकालिएको जिल्ला प्रहरी कार्यालय, काभ्रेपलाञ्चोकका प्रवक्ता डिएसपी राजकुमार श्रेष्ठले बताए । पुनः जडान गरेमा यस्ता सवारी साधनको लगत कारबाही गरिने प्रहरीले जनाएको छ । सडक अनुशासन कायम गरी सवारी दुर्घटना न्यूनीकरणका लागि प्रहरीले जिल्लामा अभियानकै रुपमा यस्तो कारबाही अघि बढाएको छ ।