काठमाडौं (एजेन्सी) । रूसी राष्ट्रपति भ्लादिमिर पुटिनले युक्रेनमा नयाँ मध्यम दूरीको क्षेप्यास्त्र प्रक्षेपण गरेर पश्चिमा मुलुकलाई चेतावनी दिएपछि रूसी क्षेप्यास्त्र आक्रमण हुन सक्ने भन्दै किएभले शुक्रबार एक दिनका लागि संसद्को कारबाही स्थगित गरेको छ ।

मस्कोले युक्रेनमाथि ३३ महिना लामो आक्रमणपछि यसै साता निप्रो शहरमा आणविक क्षमताको मध्यम दूरीको ब्यालेस्टिक क्षेप्यास्त्र प्रक्षेपण गरेसँगै तनाव थप बढेको हो ।

शुक्रबार पुटिनले पश्चिमा मुलुकमाथि आक्रमण गर्ने धम्की दिँदै आफू जस्तोसुकै परिस्थितिका लागि पनि तयार रहेको बताएको सम्बोधनलाई संयुक्त राज्य अमेरिकामा ‘बुझिएको’ क्रेमलिनले बताएको छ ।

अमेरिका र बेलायतले किएभलाई रूसी भूमिमा आक्रमण गर्न अनुमति दिएका देशहरूमाथि आक्रमण गर्ने अधिकार मस्कोसँग सुरक्षित रहेको पुटिनले बताएका थिए ।

नेटो र युक्रेनी अधिकारीहरूले ब्रसेल्समा मङ्गलबार बैठक गर्ने कार्यक्रम रहेको कूटनीतिक स्रोतहरूले एएफपीलाई बताएका छन् ।

रूसी ड्रोन र क्षेप्यास्त्रको निशानामा पर्ने आक्रमणको त्रासमा किएभस्थित युक्रेनी संसद्ले सरकारलाई शुक्रबार सोध्ने भनिएको सामान्य प्रश्नहरूको कार्यक्रमलाई रद्द गरेको छ ।

किएभको मध्य क्षेत्रमा रहेको संसद्सँगै राष्ट्रपति, केन्द्रीय बैंक र अन्य सरकारी भवनहरू छन्। राजधानीका अन्य भागको तुलनामा यो अहिलेसम्म बम विस्फोटबाट जोगिएको छ र पहुँचलाई सेनाले कडाइका साथ नियन्त्रण गरेको छ ।

केही सांसदले आफूले टाढाबाट काम गरिरहेको र शुक्रबारको संसद बैठक स्थगित गरिएको बताएका छन् ।

‘आक्रमणको बढ्दो जोखिम’

उनले भने, “किएभ र युक्रेनका अन्य भागमा पनि सामान्य रूपमा आगामी दिनमा सरकारी जिल्लामा आक्रमणको जोखिम बढ्ने सङ्केत देखिएको छ ।”

रूसी आक्रमणको खतरा देखाउँदै अमेरिकालगायत विभिन्न देशका दूतावास बन्द गरिएको घोषणा गरेको दुई दिनपछि यो जोखिम बढेको हो ।

यसैबीच, रूसी रक्षामन्त्री आन्द्रेई बेलोसोभले मस्कोमा आयोजित एक कार्यक्रममा युद्धग्रस्त पूर्वी युक्रेनमा अगाडि बढेको र किएभका उत्कृष्ट एकाइहरूलाई कमजोर प्रमाणित गरिसकेको बताए ।

रूसी रक्षा मन्त्रालयले सार्वजनिक गरेको एक भिडियोमा युक्रेनी सेनाका रक्षामन्त्री आन्द्रेई बेलोसोभले भने, “वास्तवमा हामीले सन् २०२५ को सम्पूर्ण अभियानलाई बिथोल्न सफल भएका छौँ ।”

सन् २०२५ को जनवरीमा अमेरिकी राष्ट्रपति डोनाल्ड ट्रम्पले अमेरिकाको सत्ता सम्हाल्ने घोषणा गरेका बेला मस्को र किएभले युद्धबाट आफुले फाइदा लिएको देखाउने दौडधुप गरिरहेको युक्रेन युद्धका जानकारहरूले बताएका छन् ।

पुटिनले रूसीहरूलाई सम्बोधन गरेको एक दिनपछि बेलोसोभले २४ फेब्रुअरी २०२४ मा युक्रेनमा सुरु भएको युद्धले ‘विश्वव्यापी’ स्वरूप लिएको बताए ।

रूसले ओरेश्निक नामक नयाँ प्रकारको ब्यालेस्टिक क्षेप्यास्त्रले निप्रोमा प्रहार गरेको र मस्कोले संयुक्त राज्य अमेरिका र यसका उपग्रहहरूको गतिविधिको आधारमा यस्ता थप क्षेप्यास्त्रहरू प्रक्षेपण गर्न सक्ने रूसी नेता पुटिनले बताएका छन् ।