काठमाडौं (एजेन्सी) । दक्षिण कोरियाको मुआन अन्तर्राष्ट्रिय विमानस्थलमा आइतबार एक विमान दुर्घटनामा परेको छ । अवतरणका क्रममा चिप्लिएर विमान दुर्घटना भएको हो ।

विमानमा १८१ जना सवार रहेकोमा १७५ यात्रु र ६ जना चालक दलका सदस्य थिए। दक्षिण कोरियाको दमकल विभागका अनुसार दुर्घटनामा कम्तीमा ४७ जनाको मृत्यु भइसकेको छ ।

जेजु एयरको यो विमान बैंककबाट आएको थियो । दमकल विभागका अधिकारीहरूले समाचार एजेन्सी रोयटर्सलाई बताएअनुसार, दुई जनाको जीवितै उद्धार गरिएको छ ।

उद्धार कार्य अझै पनि जारी छ।

विमानको पछाडिको भागबाट यात्रुलाई बचाउने काम भइरहेको विमानस्थल अधिकारीहरूले बताएका छन् । समाचार एजेन्सी योनहापका अनुसार विमानमा सवार १७३ यात्रु दक्षिण कोरियाका र दुई जना थाइल्याण्डका थिए ।

दक्षिण कोरियाको दमकल विभागले जारी गरेको विज्ञप्तिमा एक जना यात्रु र एक जना चालक दलका सदस्यलाई बचाइएको बताइएको छ । ३२ दमकल र ८० कर्मचारी घटनास्थलमा पठाइएको विभागले जनाएको छ ।