काठमाडौं (एजेन्सी) । अमेरिकाका ३९औं राष्ट्रपति जिमी कार्टरको १०० वर्षको उमेरमा निधन भएको छ।

वाटरगेट काण्ड र भियतनाम युद्धपछि राष्ट्रपति पद जित्ने जिम्मी कार्टरले ह्वाइट हाउसको कार्यकालपछि विश्वव्यापी मानवतावादीको रूपमा जीवनलाई पुनः परिभाषित गरेका थिए ।

सबैभन्दा लामो समयसम्म बाँच्ने पूर्वअमेरिकी राष्ट्रपतिको रेकर्ड बनाएका कार्टरको आइतबार जर्जियाको सानो शहर प्लेन्समा निधन भएको हो ।

“हाम्रा संस्थापक, पूर्व अमेरिकी राष्ट्रपति जिमी कार्टरको आज दिउँसो प्लेन्स, जर्जियामा निधन भयो”, कार्टर सेन्टरले सामाजिक मिडिया प्लेटफर्म एक्समार्फत भनेको छ ।

विज्ञप्तिमा उनको परिवारका सदस्यमाझ शान्तिपूर्वक निधन भएको उल्लेख छ ।

राष्ट्रपति जो बाइडेनले कार्टरको निधनमा शोक व्यक्त गर्दै विश्वले एक ‘असाधारण नेता, राजनीतिज्ञ र मानवतावादी’ गुमाएको र आफूले एक प्रिय मित्र गुमाएको बताएका छन् ।