काठमाडौं । इजरायलका प्रधानमन्त्री बेन्जामिन नेतान्याहुले दोस्रो चरणको युद्धविराम सफल नभएमा हमासविरुद्ध फेरि आक्रमण थाल्ने चेतावनी दिएका छन् ।

पहिलो चरणको युद्धविराम कार्यान्वयनमा आउनुअघि टेलिभिजनमार्फत आफ्ना देशबासीहरूलाई सम्बोधन गर्दै नेतान्याहुले यस्तो बताएका हुन् । इजरायल र हमासबीच पहिलो चरणको युद्धविराम आइतबारबाट हुँदैछ ।

‘यो युद्धविराम अस्थायी हो । यदि दोस्रो चरणको युद्धविराम सफल भएन भने हमासविरुद्ध पुनः आक्रमण थाल्नेछौं,’ उनले भने ।

हमासविरुद्ध गाजामा आक्रमण गर्ने अधिकार इजरायलसँग रहेको दाबी पनि उनले गरेका छन् । यसका लागि ह्वाइट हाउस फर्किन लागेका डोनाल्ड ट्रम्पसँग अनुमति लिएको उनको भनाइ छ ।

मध्यपूर्वलाई परिवर्तन गरेको उल्लेख गर्दै उनले हमास अब पूर्ण रूपमा एक्लो भएको बताए ।

इजरायल र हमासबीच १५ महिना लामो युद्ध रोक्न यही जनवरी १५ का दिन युद्धविराम गर्ने सहमति भएको छ । अमेरिका र कतारको मध्यस्थतामा भएको सहमतिअनुसार, तीन चरणमा युद्धविराम हुनेछ । आजदेखि सुरु हुने पहिलो चरणको युद्धविराम आगामी मार्च १ सम्म चल्नेछ । यो अवधिमा इजलायलको जेलमा रहेका प्यालेस्टिनीलाई रिहा गरिनेछ भने बदलामा अर्को पक्षले ३३ इजरायलीलाई छाड्नेछ ।

पहिलो चरणको युद्धविराम सफल भएमा दोस्रो चरणको युद्धविराम सुरु हुनेछ । जसमा दुवै पक्षले एकअर्का लक्षित आक्रमण नगरी बन्दी रिहा र राहत सामग्री आपूर्ति गर्न सहयोग गर्नेछन् ।