काठमाडौं । युक्रेनमा फेरि अर्को सामूहिक चिहान फेला परेको छ । युक्रेनको राजधानी किएभनजिकै नयाँ सामूहिक चिहान फेला परेको हो ।

बुजोभा गाउँनजिकै फेला परेको चिहानमा दर्जनौं गैरसैनिकका शव फेला परेको जनाइएको छ । बिबिसीका अनुसार, एउटा पेट्रोल पम्प नजिकै खाल्डोमा पुरिएको अवस्थामा शवहरू भेटिएका छन् । यसबाहेक किएभनजिकका अन्य स्थानमा पनि सामूहिक चिहान भेटिएको युक्रेनले दाबी गरेको छ । यी क्षेत्रमा केहीअघिसम्म रुसी फौजले कब्जा जमाएको थियो ।

तथापि, अहिलेसम्म यसको स्वतन्त्र पुष्टि भने भइसकेको छैन । विश्व समुदायले भने युद्ध अपराधको आरोप लगाउँदै रुसको निन्दा गरेका छन् । तर रुसले यसको खण्डन गरेको छ ।