कराँची । पाकिस्तानको कराँची विश्वविद्यालयमा मंगलबार भएको बम विस्फोटमा ३ जना चिनियाँ शिक्षकसहित ४ को मृत्यु भएको छ । बम विस्फोट विदेशी मामिला संकायको कन्फ्युसियस सेन्टरनजिकै एउटा गाडीमा विस्फोट भएको थियो ।

विस्फोटमा नवनियुक्त निर्देशक एवं दुई शिक्षकको मृत्यु भएको छ । त्यस्तै, गाडीका चालकको पनि मृत्यु भएको छ । मृत्यु हुनेमध्ये हुआन गुइपिङ, दिङ मुइपिङ र चेन साइ रहेका छन्  ।

गुइपिङ सेन्टरका निर्देशक थिए भने दिङ मुपेङ र चेन साई सेन्टरमा पढाउँथे । मृत्यु भएका चालक खालिद रहेका छन् । विस्फोटमा एक चिनियाँ नागरिक र स्थानीय नागरिक पनि घाइते भएका छन् ।

सुरक्षामा खटिएका दुई रेन्जर पनि घाइते भएका छन् । घाइतेहरुलाई पटेल अस्पतालमा भर्ना गरिएको छ । प्रहरीले सीसीटीभी फुटेज प्राप्त गरी अनुसन्धान गरिरहेको छ । विष्फोटबारे अनुसन्धान भइरहेको प्रहरीले जनाएको छ ।