काठमाडौं । निर्वाचन आयोगले आफ्नै पूर्वप्रमुख निर्वाचन आयुक्त डा.अयोधीप्रसाद यादवको निष्पक्षतामाथि शंका गरेको छ ।

आयोगले यादवलाई पर्यवेक्षकको रूपमा अनुमति दिन अस्वीकार गर्दै उनको निष्पक्षतामाथि शंका गरेका हो ।

पर्यवेक्षकको भूमिका निर्वाह गर्ने व्यक्ति कुनै पनि दलमा आवद्ध भएको हुनु हँदैन । तर, यादव कुनै राजनीतिक दलको विभागमा आवद्ध भएकोबारे आपत्ति जनाउँदै उनलाई पर्यवेक्षकको रूपमा अस्वीकृत गरिएको हो ।

निर्वाचनको बेलामा आयोगले पूर्वन्यायाधीश, संवैधानिक निकायका अधिकारी तथा अवकाश पाइसकेका विशिष्ठ श्रेणीका कर्मचारीलाई विशेष पर्यवेक्षकको अनुमति दिँदै आएको छ ।

माओवादीको केन्द्रीय निर्वाचन विभागको सदस्यमा यादवको नाम उल्लेख भएको पाएसँगै उनको नाम अस्वीकृत भएको हो ।

यता यादवले भने आयोगले आफ्नो नाम अस्वीकार गरेर आफूमाथि घोर अन्याय गरेको नेपालवाचलाई बताए । उनका अनुसार पार्टीले उनको स्वीकृतिबिना नै नाम सूचीमा राखेको हो ।

‘मलाई थाहै नदिइ उक्त सूचीमा मेरो नाम राखिएको रहेछ,’ उनले भने, ‘कुन पार्टीले मेरो नाम राखेको रहेछ यसबार मलाई नै कुनै जानकारी छैन ।’