काठमाडौं । संघीय मामिला तथा सामान्य प्रशासन मन्त्रालयले संघीय शासनको मर्यादाविपरीत हुनेगरी संघीय निजामती सेवा ऐन फास्ट ट्रयाकमा ल्याउने तयारी गरे पनि विफल भएको छ ।

सो विधेयकमा प्रस्ताव गरिएका कतिपय प्रावधान संविधानप्रतिकूल र कर्मचारीमैत्री नभएपछि तत्काल आउने सम्भावना टरेको हो ।

संघीय मामिला तथा सामान्य प्रशासन मन्त्रालयकै अधिकारीले अब सो कानून आगामी ४ मंसिरको निर्वाचनपछि बन्ने नयाँ संसदबाट मात्रै आउने बताएका छन् ।

‘जारी संसदबाट सो विधेयक स्वीकृत हुने सम्भावना करिब करिब टरेको छ,’ मन्त्रालयका एक अधिकारीले भने ।

हाल संसदको बजेट अधिवेशन चले पनि अब यो समाप्तितर्फ अघि बढेको छ । संघीय निजामती विेधयकले अझै लामो प्रक्रिया पूरा गर्नुपर्ने भएको र सत्तारुढ दलबीचमै सहमति हुन नसकेकाले जारी संसद अधिवेशनबाट पारित हुने सम्भावना अन्त्य भएको हो । राजधानी दैनिकमा खबर छ ।