पाँचदलीय सत्तागठबन्धनमा रहेका वाम घटक र एमालेबीच केन्द्रीय तहमा तिक्ततापूर्ण आरोप–प्रत्यारोप छ । तर, कैयौँ स्थानीय तहमा भने उनीहरूबीच नै तालमेल छ । चुनावमा आफू अनुकूल नतिजा निकाल्न दलहरू विरोधाभास तालमेलमा उत्रिएका छन् भने कैयौँ ठाउँ वाम तालमेल पनि देखिएको छ ।

नुवाकोटको किस्पाङमा माओवादी केन्द्र र सिन्धुलीको मरिण गाउँपालिकामा माओवादी केन्द्रका विद्रोही उम्मेदवारले एमालेसँग तालमेल गरेका छन् ।

सिन्धुपाल्चोकको सुनकोसी गाउँपालिकामा पनि एमाले र माओवादीबीच तालमेल छ ।

गुल्मीको कालिगण्डकीमा माओवादी केन्द्रले सूर्य चिह्नमा लड्ने गरी उपाध्यक्ष लिएर एमालेको अध्यक्षलाई मत दिने सहमति गरेको छ । धुर्कोट गाउँपालिकामा भने अध्यक्ष माओवादीलाई दिएर उपाध्यक्ष एमालेले लिएको छ ।

कालिकोटको महावै गाउँपालिकामा माओवादी केन्द्रले एमालेलाई उपाध्यक्ष दिएर तालमेल गरेको छ ।

हुम्लाको चंखेली गाउँपालिकामा एमाले र नेकपा एकीकृत समाजवादीबीच तालमेल भएको छ ।

अछामको मल्लेख गाउँपालिकामा पनि एमालेसँग एमालेबाटै फुटेर बनेर सत्तागठबन्धनमा रहेको दल नेकपा एकीकृत समाजवादीले चुनावी तालमेल गरेको छ । साँफेबगर नगरपालिकामा एमाले र माओवादी केन्द्रबीच तालमेल छ ।