काठमाडौं ।उपत्यकाका नगरपालिकामध्ये पछिल्लो दश वर्षमा सबैभन्दा बढी जनसंख्या कागेश्वरी मनोहरा नगरपालिकामा बढेको पाइएको छ । ०६८ मा ६० हजार दुई सय ३७ रहेकोमा ०७८ मा ह्वात्तै बढेर एक लाख ३० हजार चार सय ३३ पुगेको छ । दोस्रोमा ललितपुरको महालक्ष्मी नगरपालिका छ । ०६८ मा ६२ हजार एक सय ७२ जनसंख्या रहेकोमा यसपटकको जनगणनामा कागेश्वरी मनोहरामा एक लाख २३ हजार एक सय १६ रहेको विभागको तथ्यांकमा उल्लेख छ । तारकेश्वर नगरपालिकामा ०६८ मा ८१ हजार चार सय ४३ जनसंख्या थियो । अहिले एक लाख ५१ हजार चार सय ७९ पुगेको छ ।

नागार्जुनको जनसंख्या एक लाख १५ हजार चार सय ३७ पुगेको छ । भक्तपुरको सूर्यविनायक नगरपालिकाको जनसंख्या एक लाख ४० हजार ८५ पुगेको छ । त्यस्तै, नगरपालिकामध्ये सबैभन्दा धेरै जनसंख्या भएका पाँच महानपालिकामा क्रमशः काठमाडौं, पोखरा, भरतपुर, ललितपुर र वीरगन्ज छन् भने सबैभन्दा कम जनसंख्या भएका पाँच नगरपालिकामा डोल्पा जिल्लाको ठूलीभेरी र त्रिपुरासुन्दरी, संखुवासभाको मादी, तेह्रथुमको लालीगुराँस र संखुवासभाको धर्मदेवी नगरपालिका छन् ।

सबैभन्दा धेरै जनसंख्या भएको काठमाडौं महानगरमा आठ लाख ६२ हजार चार सय र सबैभन्दा कम जनसंख्या भएको ठूलीभेरी नगरपालिकामा नौ हजार आठ सय ६१ रहेको छ । २० हजारभन्दा कम जनसंख्या हुने नगरपालिकाको संख्या १४ रहेको छ भने एक लाखभन्दा बढी जनसंख्या हुने नगरपालिकाको संख्या ३७ वटा रहेका छन् ।