काठमाडौं । नेपालीलाई भुटानी शरणार्थी बनाउने धन्दामा संलग्नको आरोपमा पक्राउ परेका पूर्वमन्त्री टोपबहादुर रायमाझीका छोरा सन्दीपलाई प्रहरीले काठमाडौं ल्याउन लागेको छ ।

बुधबार राति बुटवलमा पक्राउ परेका सन्दीपलाई अदालतमा पेस गरेर म्याद थपका लागि प्रहरीले काठमाडौं ल्याउन लागेको हो ।

प्रहरी स्रोतले उनलाई बुटवलस्थित विमानस्थलबाट काठमाडौं ल्याएर आजै अदालतमा पेस गर्न लागिएको जनाएको छ ।

नक्कली भुटानी शरणार्थी प्रकरणमा सरकारले पूर्वमन्त्री टोपबहादुर रायमाझी, उनका पुत्र सन्दीप, सचिव टेकनारायण पाण्डे, एमाले नेता रामबहादुर थापा बादल पुत्र प्रतीकलगायत व्यक्तिविरुद्ध पक्राउ पुर्जी जारी गरेको छ । यसमध्ये पाण्डे र सन्दीप पक्राउ परिसकेका छन् भने अन्यको खोजी भइरहेको प्रहरीले जनाएको छ । सोही घटनामा संलग्नको आरोपमा यसअघि नै प्रहरीले विभिन्न व्यक्तिलाई पक्राउ गरेर अनुसन्धान गरिसकेको छ । उनीहरूकै बयान र उपलब्ध गराएको प्रमाणका आधारमा मंगलबार मात्रै पूर्वमन्त्री बादलका सल्लाहकार इन्द्रजित राई पक्राउ परेका थिए ।