काठमाडौं । जलस्रोत तथा सिचाईं विभागका तत्कालिन महानिर्देशक मधुकरप्रसाद राजभण्डारीले तीन करोड ८५ लाख ५१ हजार ७४० रूपैयाँ बराबरको अकुत सम्पत्ति आर्जन गरेको पाइएको छ ।

अख्तियार दुरुपयोग अनुसन्धान आयोगले उनले सार्वजनिक सेवामा प्रवेश गरेको मितिदेखि २०७९ भदौ ३१ गतेसम्मको आय र खर्चबारे अनुसन्धान गरेको थियो । २०५९ फागुन ३० देखि सेवा प्रवेश गरेका उनी हाल अवकाश प्राप्त हुन् ।

यो अवधीमा उनको खर्च तथा लगानी भने सात करोड ४२ लाख २९ हजार ८६ रुपैयाँ देखिएको छ ।

वैधानिक स्रोत नखुलेपछि उनीविरूद्ध अख्तियारले आज विशेष अदालतमा भ्रष्टाचार मुद्दा दायर गरेको छ ।

स्रोत नखुलेको उक्त रकम बराबरको सम्पत्ति राजभण्डारीले पत्नी दीपा श्रेष्ठको नाममा खरिद गरेको जग्गा, घर निर्माण, कम्पनी लगानी, बिमा प्रिमियम भुक्तानी लगानीमा गरेको पाइएको छ । आयोगले उनकी श्रीमति दीपालाई पनि प्रतिवादी बनाएर मुद्दा दायर गरेको छ ।

आरोपी राजभण्डारी र उनकी श्रीमती दीपाको नाममा रहेको सम्पत्ति जफतको मागदाबी गर्दै विशेष अदालतमा मुद्दा दायर गरिएको हो ।