कोरोना भाइरस महामारीपछि घरमै बसेर शारीरिक कसरत गर्ने संस्कृति विकास भयो । यस्तै, कार्य व्यवस्थाका कारण पनि मानिसहरू जिमखाना जान सकिरहेका हुँदैनन् । यसले गर्दा, कोही मोबाइलमा फिटनेस एपको माध्यमबाट व्यायाम गरिरहेका भेटिन्छन् त कोही युट्युबमार्फत । भर्चुअल माध्यमबाट यसरी एक्सरसाइज गर्दा यसले शरीरलाई दीर्घकालीन समस्यामा धकेलिरहेको धेरैलाई पत्तो नै हुँदैन ।

हिजोआज ढाड दुख्ने र घुँडाको समस्या हुने बिरामीको संख्या बढेको छ । यस्ता बिरामीले त झनै एपमार्फत एक्सरसाइज गर्नु हुँदैन ।

-मानिसको शारीरिक स्थितिअनुसार उनीहरूले गराउने कसरत पनि फरक हुन्छ । त्यसमाथि शारीरिक व्यायामसँगै क्यालोरी पनि मिलाउनुपर्ने हुन्छ । एपमा देखाइने एक्सरसाइस पछ्याउँदा शरीरको कोण पनि मिलाउनुपर्ने हुन्छ । व्यक्तिअनुसार शरीर पनि फरक हुने हुँदा एपमा पाइने टिप्स सबैलाई लागू हुँदैन ।

-कतिपय टिप्स हेरेरमात्र सिको गर्न खोज्दा थाहा हुँदैन । यस्ता विषय नबुझी एपको फिटनेस अनुसरण गर्दा पछि गएर घुँडा, ढाड, जोर्नीको समस्या देखिने, हिपलाइनमा असर गर्ने, मासु तन्किनेजस्ता समस्या देखिने सम्भावना हुन्छ । त्यसमाथि हिजोआज ढाड दुख्ने, घुँडाको समस्या हुने बिरामीको संख्या बढेको छ । यस्ता बिरामीले त झन् एपमार्फत एक्सरसाइज गर्नै हुँदैन ।

-विशेषगरी, मोटोपना भएका, अपरेसन गरेर बच्चा जन्माएका महिलाले विशेष ध्यान दिनुपर्ने हुन्छ । त्यसैले, यस्ता एकसरसाइज फिटनेस प्रशिक्षकबिना गर्नु उपयुक्त हुँदैन ।

-यसको मतलब शारीरिक व्यायाम नै नगर्ने भन्न खोजिएको होइन । पहिलादेखि नै प्रशिक्षकबाट सहयोग लिएर जानेकाहरूले गर्दा हुन्छ । नजानेकाले घरमै बसेर गर्न सकिने अरु पनि एक्सरसाइज छन् । सामान्य योग, प्राणायाम, जोइन्ट एक्सरसाइज गर्न सकिन्छ । मोटोपना भएका र ब्याकबोनको समस्या भएकाले हिँडडुल गर्दा नै राम्रो हुन्छ । संगीतमा नृत्य गर्र्ने तथा छतमा हिँडडुल गर्न सकिन्छ ।