काठमाडौं । पछिल्लो ६ महिनामा १० ठूला कम्पनीले हजारौं कर्मचारी कटौती गरेका छन् । संसारभरका धेरै कम्पनीहरूले अगाडि देखापरेको आर्थिक संकटबाट बच्न कर्मचारी कटौतीको अस्त्र प्रयोग गरेका छन् । अब यो सूचीमा टेक कम्पनी जुमको नयाँ नाम पनि थपिएको छ । जुमले १३ सय कर्मचारीलाई निकाल्ने निर्णय गरेको छ । यसअघि सोमबार सार्वजनिक भएको एक रिपोर्ट अनुसार डेलले आफ्ना ६००० भन्दा बढी कर्मचारीलाई निकाल्ने घोषणा गरेको छ ।

विश्वका प्रमुख प्राविधिक कम्पनीहरूमा कटौतीको प्रक्रिया जारी छ। कोरोना महामारीपछि अहिले विश्वभर मन्दीको प्रभाव बढ्दै गएको छ । गत महिना जनवरीमा नै धेरै प्राविधिक कम्पनीहरूले करिब ५० हजार कर्मचारीलाई निकालेका छन् ।

आउनुहोस् जानौं, पछिल्लो छ महिनामा कुन–कुन कम्पनीले कर्मचारी कटौती गरे ः

१. जुम

कर्मचारी कटौतीको पछिल्लो घटना भिडियो कन्फरेन्सिङ सेवा कम्पनी जुमसँग सम्बन्धित छ । वास्तवमा, जुमले १३०० कर्मचारीहरूलाई हटाउने निर्णय गरेको छ। यो कम्पनीको कुल जनशक्तिको १५ प्रतिशत हो । कम्पनीका सीईओ एरिक युआनले कम्पनीको वेबसाइटमा ब्लग पोष्ट गरेर यो जानकारी दिएका हुन्।

२. डेल

सोमबार डेल टेक्नोलोजीले आफ्ना ६००० भन्दा बढी कर्मचारीहरूलाई हटाउने घोषणा गर्‍यो। रिपोर्टहरूका अनुसार डेलले आफ्नो विश्वव्यापी कार्यबलको पाँच प्रतिशत घटाउने योजना बनाएको छ। कम्पनीका उपप्रमुख अपरेटिङ अफिसर जेफ क्लार्कले आफ्ना कर्मचारीहरूसँग साझा गरेको लिखतमा बजारले चुनौतीपूर्ण अवस्थाको सामना गरिरहेको बताएका छन्। क्लार्कका अनुसार कम्पनीले सन् २०२० मा पनि यस्तै खालको घोषणा गरेको थियो ।

३. बाइजुको

सोमबार सार्वजनिक रिपोर्टअनुसार एनटेक युनिकर्न बाइजूले करिब १,५०० कर्मचारी निष्कासनको निर्णय गरेको छ । बाइजुले खर्च अप्टिमाइजेसन र सञ्चालनको आउटसोर्सिङका कारण यस्तो गरेको बताइएको छ ।

यसअघि अक्टोबरमा पनि बाइजुले करिब २ हजार ५ सय कर्मचारी बिदा गरेको थियो जुन यसका कार्यबलको ५ प्रतिशत थियो।

४. मेटा

फेसबुकको मूल कम्पनी मेटाले थप कर्मचारी कटौती गर्ने संकेत गरेको छ। मिडिया रिपोर्टका अनुसार कार्यकारीहरूको भर्खरै सम्पर्क बैठकमा सीईओ मार्क जुकरबर्गले थप कटौतीको सम्भावनालाई जोड दिएका छन्। मेटा कम्पनीले गत वर्ष नोभेम्बरमा १३ प्रतिशत कर्मचारी कटौती गरेको थियो, जुन कम्पनीको इतिहासमै सबैभन्दा ठूलो कटौती हो।

५. स्विगी

खाद्य वितरण प्लेटफर्म स्विगीले जनवरीमा ३८० कर्मचारीलाई निकाल्ने घोषणा गरेको थियो। यसबारे जानकारी दिँदै कम्पनीले यो निकै कठिन निर्णय भएको बताएको थियो । कम्पनीका प्रमुख कार्यकारी अधिकृत श्रीहर्ष माजेतीले कर्मचारीलाई पठाएको मेलमा खाद्यान्न वितरण क्षेत्रको वृद्धिदर सुस्त भएको उल्लेख छ ।

६. अल्फाबेट

जनवरी महिनामा नै टेक दिग्गज गुगलको मातृ कम्पनी अल्फाबेटले १२ हजार कर्मचारीलाई हटाउने घोषणा गरेको थियो । मिडिया रिपोर्टका अनुसार कम्पनीका सीईओ सुन्दर पिचाईले कर्मचारीहरूसँग साझा गरिएको मेमोमा यो जानकारी दिएका हुन्।

७. माइक्रोसफ्ट

विश्वको नम्बर एक सफ्टवेयर कम्पनी माइक्रोसफ्टले जनवरीमा ११ हजार कर्मचारी बिदा गरेको छ । कम्पनीमा कार्यरत पाँच प्रतिशत कामदारलाई निकालिएको थियो। माइक्रोसफ्टले मानव संसाधन र ईन्जिनियरिङ् विभागहरूमा छाँटकाँट गरेको हो । एक रिपोर्टका अनुसार अक्टोबरमा माइक्रोसफ्टले विभिन्न विभागका करिब १ हजार कर्मचारीलाई बाहिरको बाटो देखाएको थियो । कम्पनीले गत वर्ष जुलाईमा पनि केही कर्मचारीलाई निकालेको थियो ।

८. अमेजन

आईटी क्षेत्रको विशाल कम्पनी अमेजनले पनि कर्मचारी कटौतीको अस्त्र प्रयोग गरेको छ । यो कदमबाट करिब १८ हजार कर्मचारी प्रभावित हुने कम्पनीका सीईओ एन्डी जस्सीले बताए । कम्पनीले भारतमा मात्रै १००० भन्दा बढी कर्मचारीलाई बिदा गरेको छ । अमेजनले बर्खास्त गरिएका कर्मचारीहरूलाई पाँच महिनाको अग्रिम तलब दिने इमेल पठाएको थियो।

९. आइबिएम

जनवरीमा आईबीएम कर्पोरेसनले आफ्नो सम्पत्तिको अंश बाँड्ने योजनाको रूपमा ३९ण्ण् कर्मचारीहरूलाई हटाउने योजना घोषणा गर्‍यो। कम्पनीले चौथो त्रैमासिकमा वार्षिक नगद लक्ष्य गुमाएपछि यो निर्णय गरिएको हो ।

१०. ट्विटर

ट्विटरले उत्पादन विभागमा ५० कर्मचारी हटाउने योजना बनाएको छ ।

अक्टोबरमा ट्विटर खरिद गरेपछि मस्कले धेरै संगठनात्मक परिवर्तनहरू गरेका छन् । उनले एक हप्ताभित्र ७५०० कर्मचारी बिदा गरेका थिए । यो कटौटी कुल कर्मचारीको ५० प्रतिशत थियो ।