काठमाडौैं । नेपाली सेनाका प्रधान सेनापतिपछि दोस्रो बरियताका उच्च अधिकारी सरोज प्रताप राणा बिदामा बसेका छन् । उनी बिदामा बसेसँगै नेपाली सेनामा भावी प्रधान सेनापति छनोटको प्रक्रिया अघि बढेको छ ।

११ कात्तिकदेखि अवकाश पाउन लागेका राणा आइतबारदेखि बिदामा बसेको सैनिक मुख्यालयले जनाएको छ । उनको अवकाशपछि रिक्त हुने रथीमा पदमा बढुवा हुने उपरथी नै १० महिनापछि नेपाली सेनाको प्रधान सेनापति हुनेछन् । यसअघि राणाको म्याद थप हुने आकलन समेत थियो ।

राणा आफैं बिदामा बसेपछि उनको म्याद थप हुने सम्भावना समाप्त भएको छ । रिक्त हुने पदमा उपरथीद्वय ताराध्वज पाण्डे र अशोक सिग्देलबीच प्रतिस्पर्धा छ । जसको हाल रथीमा बढुवा हुँदा आगामी भदौमा उनी प्रधान सेनापति हुनेछन् । बरियतामा पाण्डे अगाडि रहेकाले उनकै बढुवा हुने सम्भावना रहेको र प्रधान सेनापति प्रभुराम शर्मा पनि उनीसँग सकारात्मक रहेको सैनिक स्रोत बताउँछ । सेनामा प्रहरीमा जस्तो बढुवामा राजनीति नहुने भएकाले बरियताअनुसार नै प्रधान सेनापति छनोट हुने गरेको छ ।