काठमाडौैं । गैरआवासिय नेपाली संघका नेता आरके शर्मामाथि कुटपिटको आरोपमा एमाले नेता महेश बस्नेतविरुद्ध प्रहरीमा उजुरी परेको छ । मंगलबार बालुवाटारस्थित एनआरएनको कार्यालयमा बस्नेत लगायत युवा संघका नेताले शर्मामाथि कुटपिट गरेको आरोप लागेको छ ।
नेपाल पत्रकार महासंघ बेल्जियमका अध्यक्ष ओम शर्माले नेता बस्नेत र एनआरएनको अध्यक्षमा नियुक्त भएका बद्री केसीविरुद्ध दरबारमार्ग वृत्तमा उजुरी दिएका हुन् ।

केसी एमाले निकट हुन् । शर्मा माओवादी निकट हुन् । अवैध तरिकाले चुनाव जितेको आरोप केसीमाथि छ । जसकारण एनआरएन कार्यालयमा मंगलबार दिनभर तनाव भएको थियो । उजुरी उपर प्रहरीले मिलापत्र गराउन प्रयास गरेको स्रोत बताउँछ ।
एमाले नेता बस्नेत केसीलाई साथ दिन एनआरएनको कार्यालय पुगेका थिए । उनकै निर्देशनमा केसीका आलोचकमाथि कुटपिट भएको बताइएको छ ।

यसअघि नेता बस्नेतमाथि सांसद अपहरणको उजुरी पनि परेको थियो ।