काठमाडौैं । समस्याग्रस्त सहकारी घोषित लालीगुँरास बहुउदेश्यीय सहकारीका सञ्चालकविरुद्ध ठगी मुद्दा दायर भएको छ । सहकारीकी एक वचतकर्ताको उजुरीका आधारमा जिल्ला प्रहरी परिसर, काठमाडौंले गत साता जिल्ला अदालत, काठमाडौंमा मुद्दा दायर गरेको हो ।
सहकारीको चुच्चेपाटी शाखाकी सदस्य दावा डोमा शेर्पाले एक करोड ६९ लाख रुपैयाँ फिर्ता नगरेको भन्दै जाहेरी दिएकी थिइन् । सोही आधारमा प्रहरीले चुच्चेपाटी शाखाका कर्मचारी धुव्र खरेललाई पक्राउ गरी अन्य सञ्चालकलाई फरार प्रतिवादी बनाएर मुद्दा दायर गरेको हो ।
संस्थाका अध्यक्ष अमरदास श्रेष्ठ, प्रमुख कार्यकारी अधिकृत सुरेन्द्र भण्डारी, उपाध्यक्ष हजुरी बिष्ट, कोषाध्यक्ष अमृत कुमार अर्याल, सञ्चालक कमदबाबा जोशी, आर्या सिंह भण्डारी, पुन्य प्रसाद पोखरेल, बिद्यादेवी पाण्डे र तिमिला रञ्जितविरुद्ध मुद्दा दायर गरेको हो ।
खरेलले आफुसँग एक करोड ६९ लाख लिएको तर खातामा जम्मा नगरेको पीडितको आरोप छ । खरेलले भने आफु सहकारीको कर्मचारी मात्र भएको र संस्थाले पैसा फिर्ता गर्न नसक्दा आफुमाथि ठगीको आरोप लागेको बताएका छन् ।
लालीगुराँस सहकारीमा सर्वसाधरणको सात अर्बभन्दा धेरै बचत फसेको छ । सहकारी विभागले सो सहकारीलाई समस्याग्रष्त घोषणा गरी छानविन गरिरहेको छ । प्रमुख कार्यकारी अधिकृत भण्डारीले संस्थाको धेरै रकम दुरुपयोग गरी निजी कम्पनीमा लगानी गरेका हुन् ।