काठमाडौं । तनावकाबीच जो बाइडन अमेरिकाको ४६ औं राष्ट्रपतिमा निर्वाचित भएको प्रमाणित भएको छ । अमेरिकाको दुवै सदनको संयुक्त बैठकले राष्ट्रपतिमा बाइडेन र उपराष्ट्रपति कमला ह्यारिस विजयी भएको प्रमाणित गरेको हो । बाइडेन ३०६ इलेक्टोरल मत प्राप्त गरी विजयी भएका हुन् । उनका प्रतिद्वन्द्वी रिपब्लीकन पार्टीका डोनाल्ड ट्रम्पले २३२ इलेक्टोरल मत प्राप्त गरे । तर, चुनावमा धाँधली भएकाे भन्दै ट्रम्प समर्थकहरुले संसद भवनमैं प्रवेश गरेर हिंसा मच्चाएका थिए । हिंसामा चार जनाले ज्यान गुमाएका छन् । कार्यक्रम केही समयपछि रोकेपछि निर्वाचन परिणामलाई दुवै सदनले प्रमाणित गरेको हो । नयाँ राष्ट्रपतिले जनवरी २० मा सपथ लिएर नयाँ कार्यभार सम्हाल्नेछन् ।