नुवाकोट । चिसो बढ्न सुरु भएपछि लाङटाङ राष्ट्रिय निकुञ्जमा लोपोन्मुख रातो हाब्रे (रेड पाण्डा) देखिन थालेका छन् । समुद्री सतहदेखि तीन हजार मिटरभन्दा माथिका स्थानमा रातो हाब्रे देखिन थालेको लाङटाङ राष्ट्रिय निकुञ्ज कार्यालयले जनाएको छ ।

निकुञ्जका अनुसार चन्दनबारीको माथिल्लो भेग चोलाङपाटी जङ्गलमा रातो हाब्रे देखिन थालेको हो । लोपोन्मुख रातो हाब्रे हिमपातको समयमा घाम ताप्नका लागि निकुञ्जको उक्त क्षेत्रमा निस्किने गर्दछ ।

रसुवामा सन् १९८७ मा गरिएको एक अध्ययनले चन्दनबारी तथा चोलाङपाटीमा रातो हाब्रे पाइने पत्ता लागेको थियो । सोही समयदेखि लाङटाङ राष्ट्रिय निकुञ्जमार्फत रातो हाब्रे संरक्षणका लागि विभिन्न कार्यक्रम चलाईँदै आएको छ ।