काठमाडौ । नेकपा अध्यक्ष पुष्पकमल दाहाल प्रचण्डकी श्रीमती सिता दाहालको स्टेम सेल थेरापीको बिहिबार अप्रेशन भएको छ । भारतको मुम्बईस्थित न्यूरोजेन ब्रेन एण्ड स्पाईन इन्सटिच्युटमा पत्नी दाहालको अप्रेशन भएको र अप्रेसन सफल भएको दाहालकी माइला ज्वाई अर्जुन पाठकले नेपालवाचलाई जानकारी दिए । लामो समयदेखि प्रोग्रेसिभ सुपरन्युक्लियर पालसी पिएसपी भन्ने रोगबाट पिडित दाहालको स्वास्थ्यमा थप समस्या आएपछि उपचारका लागि दिल्ली लगिएको हो । मुम्बई लैजानु अघि दाहाललाई ललितपुरस्थित मेडिसिटी अस्पतालमा राखेर उपचार गरिएको थियो । माइला ज्वाई पाठकका अनुसार सिता दाहालको हिजो भएको अप्रेशन सफल भएको छ । तर अप्रेशनपछि दाहालको स्वास्थ्यमा थप सुधार आउन कम्तिमा दुई साता लाग्ने अस्पतालले जनाएको पाठकले बताए । सिता दाहालको हेरचाहका लागि प्रचण्ड आफ्ना दुई छोरीहरुका साथ मुम्बईमा छन् । सिताको उपचारमा न्युरोजेन ब्रेन एण्ड स्पाईन इन्सटिच्यूटका बरिष्ठ चिकित्सक डा अलोक शर्माले नेतृत्व गरेका छन् ।