काठमाडौं । राजनीतिक रुपमा विभाजित नेकपाको प्रचण्ड–नेपाल समूहले निर्वाचन आयोगलाई चुवावसम्बन्धी काम रोक्न आग्रह गरेको छ । उक्त समूहका अध्यक्ष पुष्प कमल दाहाल ‘प्रचण्ड’ र माधव नेपालसहित नेकपाका नेताहरुको टोलीले कान्तिपथस्थित आयोगको कार्यालय पुगेर चुनावसम्बन्धी कार्यक्रम रोक्न आग्रह गरेका हुन् । तर, आयोगले भने निर्वाचनसम्बन्धी कार्यक्रमलाई रोक्न अस्वीकार गरेको छ । आयोगका पदाधिकारीहरुले सरकारले निर्वाचनको मिति तोकेपछि आफूहरुले काम अघि बढाएको बताउँदै आयोगको तटस्थतामा शंका नगर्न प्रचण्ड–नेपाल समूहलाई अनुरोध गरेका छन् । अदालतले निर्वाचन रोक्ने आदेश दिएपछि मात्रै आयोगले निर्वाचनका कार्यक्रम रोक्न पदाधिकारीहरुले बताएका छन् । गत पुस ५ गते प्रधानमन्त्री केपी शर्मा ओलीले प्रतिनिधिसभा विघटन गरेसँगै आगामी वैशाख १७ र २७ गतेलाई निर्वाचनको घोषणा भएको थियो ।