काठमाडाैं । प्रतिनिधि सभा विघटन सम्बन्धी रिटमाथि आज सुनुवाइ हुँदैछ । यस रिटको सुनुवाइ भने प्रधानन्यायाधीश चोलेन्द्र शमशेर जबरासहितको इजलास गर्नेछ । गत ५ पुसमा सरकारले गरेको प्रतिनिधि सभा विघटन असंवैधानिक भएको भन्दै १३ वटा रिट दायर भएको थियो । यी रिटको सुनुवाइ सर्वोच्चको संवैधानिक इजलास बाटै किनारा लगाउने कि वृहत् पूर्ण इजलासबाट भन्नेमा बहस भइरहेको छ । आज यस विवादमाथि टुंगो लागेपछि प्रतिनिधि सभा विघटन संवैधानिक कि असंवैधानिक भन्नेमा मुल विवादमा प्रवेश गरि सुनुवाइ हुनेछ । यसअघि पनि प्रतिनिधि सभा विघटन हुँदा सर्वोच्चका ११/११ न्यायाधीशको वृहत् पूर्ण इजलासबाट सुनुवाइ भएको नजिर छ भने कानुनी अडबड फुकाउन गत लकडाउनमै पनि १९ जना न्यायाधीशको वृहत् पूर्ण इजलासले मुद्दा फैसला गरेको नजीर कायमै छ। प्रतिनिधि सभा विघटन सम्बन्धि रिटमाथि प्रधानन्यायाधीश जबरासहित न्यायाधीशहरू सपना प्रधान मल्ल, विश्वम्भरप्रसाद श्रेष्ठ, अनिल कुमार सिन्हा र तेज बहादुर केसी रहेको संवैधानिक इजलासबाट सुनुवाइ भइरहेको छ । यस रिटमाथि न्यायाधीश हरिकृष्ण कार्कीको स्वार्थ बाझिएपछि इजलासबाट बाहिरिएका थिए र उनको ठाउँमा मल्ल आएकी हुन् ।