काठमाडौं । काभ्रेमा पराल बोकेको मिनी ट्रक दुर्घटना हुँदा २ को ज्यान गएको छ । १ जना घाइते भएका छन् ।

पनौती नगरपालिका – २ स्थित सिलाभन्ज्याङमा मिनी ट्रक दुर्घटना हुँदा चालक पनौतीका ४० वर्षीय रबिन आचार्य र बेथानचोक गाउँपालिका- २ का ५० वर्षीय शिवविक्रम केसीको ज्यान गएको काभ्रे प्रहरीले जनाएको छ ।

दुर्घटनामा गम्भिर घाइते भएका आचार्य र केसीलाई बनेपामा रहेको शिर मेमोरियल अस्पतालमा उपचारका क्रममा मृत्यु भएको हो ।

दुर्घटनमा बेथानचोक-२ की ४५ वर्षीया शारदा तिमल्सिना गम्भीर घाइते भएको र उनको शिर मेमोरियल अस्पतालमै उपचार भइरहेको छ ।

मंगलबार दिउँसो २ बजेतिर पनौतीको कुशादेवीबाट नयाँगाउँतर्फ जाँदै गरेको बा.४ ख.६७२३ पराल बोकेको ट्रक ब्रेक फेल भई सडकबाट करिब ६ सय मिटर तल खसेको थियो ।