काठमाडौं । सरकारले संसद् विघटनको सिफारिस प्रस्ताव राष्ट्रपति समक्ष लगेको छ । प्रतिनिधिसभा विघटनको यो प्रस्ताव पारित भए राष्ट्रियसभादेखि प्रदेश सभा र स्थानीय तह के हुन्छ भन्ने अन्योल छ । संविधानविद् डा. चन्द्रकान्त ज्ञवाली सरकारले अहिले राष्ट्रपतिसमक्ष लगेको संसद् विघटनको प्रस्ताव प्रतिनिधिसभासँगमात्र सम्बन्धित भएको बताए । उनले भने, ‘सरकारले विघटन गर्न लागेको संघीय संसद् अन्तगर्तको प्रतिनिधि सभामात्रै हो ।’संविधानअुनसार राष्ट्रियसभा स्थायी सदन भएको र यसलाई सरकारले विघटन गर्न नसक्ने उनले बताए । प्रदेश र स्थानीय तह पनि छुट्टाछुट्टै सरकार भएकाले अहिलेको कदमले त्यसलाई प्रभाव नपर्ने संविधानविद् ज्ञवालीले बताए ।