काठमाडौं । बालुवाटारमा बसेको प्रधानमन्त्री तथा नेकपाका अध्यक्ष केपी शर्मा ओली समूहको केन्द्रीय कमिटीको बैठकलाई सम्बोधन गर्दै ओलीले ‘पिलो निचोरेर फाल्दैमा तौल घट्दैन’ भन्दै प्रचण्ड–नेपाल समूहमाथि व्यंग्य गरेका छन् । प्रधानमन्त्रीका प्रेस सल्लाहकार सूर्य थापाका अनुसार ओलीले जीवन शर्माको गीत ‘पिलो निचोरेर फाल्दैमा तौल घट्दैन’ गुनगुनाउँदै बैठकमा सम्बोधन गरेका हुन् । प्रधानमन्त्री ओलीले प्रतिनिधि सभा विघटन गरेसँगै नेकपामा प्रचण्ड–नेपाल र ओली समूह बिच एकअर्कालाई दोषारोपण र कटाक्ष भईरहेको छ । यसैबिच प्रधानमन्त्री ओलीले बोलाएको केन्द्रीय कमिटी बैठकमा प्रचण्ड–नेपाल समुहप्रति लक्षित हुँदै उनले यस्तो बताएका हुन् । बालुवाटारमा बसेको बैठकबाट ओलीले महाधिवेशन आयोजक समिति गठन गरेका छन् । उनले साविकको ४४६ सदस्यीय केन्द्रीय कमिटीमा ५५६ जना नयाँ सदस्य थपेर ११ सय ९९ सदस्यीय महाधिवेशन आयोजक समिति घोषणा गरेको बैठकमा सहभागी एक केन्द्रीय सदस्यले जानकारी दिए । ओलीको यो कदमसँगै नेकपा औपचारिक रुपमा फुटेको छ ।