मुग्लिन । मनकामना केबुलकार सेवा एक साताका लागि बन्द हुने भएको छ । नियमित मर्मतसम्भारका लागि सात दिन बन्द गर्न लागिएको मनकामना दर्शन प्रालिका नायब महाप्रबन्धक उज्ज्वल शेरचनले बताए । उनका अनुसार पुस १४ गतेदेखि पुस २० गतेसम्म केबुलबार सेवा बन्द रहनेछ । कोरोनाको महामारीसँगै नौ महिना बन्द रहेको केबुलकार गत मङ्सिर २८ गतेबाट पुनः सञ्चालनमा आएको थियो । लामो समय बन्द रहेको मनकामना मन्दिर खुलेपछि यात्रुको चाप पनि बढेको थियो । यात्रुको चाप बढ्दै गए पनि केबलकार मर्मत कम्पनीको प्राविधिक निर्देशिका र आवश्यकताअनुसार नियमित मर्मतसम्भारको समयतालिकामा अनिवार्य सेवा बन्द गरी मर्मत गर्नुपर्ने भएको शेरचनले बताए । नियमित मर्मतसम्भारपछि पुस २१ गते मङ्गलबारदेखि पुनः नियमित सेवा सञ्चालन हुनेछ ।